Bidd’at ki bahas

Bidd’at ke maana aur iski aqsaam

Bidd’at ke lughwi maana hain nai cheez, Qurane kareem farmata hai:

“Farma do ke main naya rasool nahin hoon”
(46:9)

Is aayat mein lafze bidd’at lughwi maana mein istemal hua hai

Mirqaat Sharhe Mishkaat mein hai ke Bidd’at wo kaam hai jo baghair guzri misaal ke kiya jaaye (yaani jiski misaal pehle na ho)

Ab bidd’at teen maana mein istemal hota hai, naya kaam jo Huzoor alaihissalam ke baad ijaad hua, khilafe sunnat kaam jo sunnat ko mitane waala ho, bure aqaid jo baad mein paida hue, pehle maana se bidd’at do qism ki hai, hasana aur sayyiah (yaani achhi aur buri), dusre do maana mein har bidd’at buri hai aur hadees mein inhi dono maano mein farmaya gaya ke har bidd’at gumrahi hai lihaza hadees aur aimma ke aqwaal ka aapas mein koi takraaw nahin

Bidd’at ke sharai maana hain ke wo aqaid aur wo kaam jo Nabi alaihissalam ke zamane mein na the, isse ye natija nikla ke bidd’ate sharai do tarah ki hain, ek amali aur ek etiqadi (aqeede se mutalliq) aur ye bure aqaid hain, jaise jabriya, qadriya, marjiya, chakdalwi, ghair muqallid aur deobandi wahabi ke aqaid bidd’at hain kyunki ye sab baad ko bane

Achhi Bidd’at ka suboot:

Allah ta’ala ne Quran mein eisaiyo ke dunya ko tark kar dene ke amal ko achhi bidd’at qarar diya aur jo ise nibha na sake un par itaab aaya lihaza isse maloom hua ke musalman mehfile milad waghaira par pabandi karein, Mishkaat mein hai ke jo shakhs humare deen mein wo aqeeda ijaad kare jo deen ke khilaf ho wo mardood hai, Saabit hua ke bidd’at aqeede ko farmaya gaya, isi Mishkaat mein hai ke hai ke Hazrate Ibne Umar radiallaho ta’ala anho se kisi ne kaha ke fulaan ne aapko salam bheja hai to farmaya ke mujhe khabar mili hai ke wo bidd’ati ho gaya hai agar aisa hai to usko mera salam na kehna, bidd’ati kaise hua? farmate hain:
“Huzoor alaihissalam farmate the ke meri ummat mein zameen mein dhansna soorat badalna patthar barasna hoga qadriya logon mein”maloom hua ke wo qadriya yaani taqdeer ka munkir ho gaya tha, usko munkir farmaya

Durre Mukhtar kitabus salaat baabul ummat mein hai:
Bidd’ati imam ke pichhe namaz makrooh hai, Bidd’at us aqeede ke khilaf etiqad rakhna hai jo Huzoor alaihissalam maroof hain”
In ibaraat se maloom hua ke bidd’at naye aur bure aqaid ko kehte hain aur bidd’at aur bidd’ati ke baare meim ahadees mein jo sakht hukm aaya hai wo aqeede ke talluq se hai, Fatawa Rasheediya mein hai ke “Jis bidd’at mein aisi shadeed wayeed ho wo bidd’at fil aqaid hai jaise ke rawafiz khawarij”
Bidd’ate amali har wo kaam hai jo Huzoor alaihissalam
ke zamane mein na thi chahe deeni ho ya dunyawi,
khwah sahaba -e- kiraam ke zamane mein ho ya baad
mein

Mirqaat mein hai ke bidd’at shariat mein us kaam ka ijaad karna hai jo ke Huzoor alaihissalam ke zamane mein na ho, Ash’atul Lam’aat mein bhi yahi hai ke jo kaam Huzoor alaihissalam ke zamane ke baad ijaad hua wo bidd’at hai
In ibarato mein na sahaba ke zamane ki qaid hai, na kaam ka lihaaz, jo kaam bhi ho deeni ya dunyawi wo bidd’at hoga chahe sahaba ke zamane mein ho, haan urfe aam mein ijadaate sahaba ko sunnate sahaba kehte hain bidd’at nahin bolte, ye urf hai warna Hazrate Umar Faruque ne taraweeh ki jama’at muqarrar farma kar kaha ke ye to bahut achhi bidd’at hai

Bidd’ate amali ki do qism hain,                                       hasana aur saiyyah
yaani achhi aur buri, bidd’ate hasana wo kaam hai jo kisi sunnat ke khilaf na ho, jaise mehfile milad aur deeni madaris aur naye naye umda khane, aur press mein deeni kitab wa kutub ka chhapwana aur bidd’ate saiyyah wo hai jo kisi sunnat ke khilaf ho ya kisi sunnat ko mitaane waali ho jaise ke ghair arabi mein jumuah ka khutba wa eidain ka padhna aur loudspeaker par namaz padhana ke is mein sunnat uth jaati hai

Mishkaat mein hai:
Jo koi islam mein achha tariqa jaari kare usko sawab milega, aur uska bhi jo us par amal karein aur uske sawab mein kuchh kami na hogi, aur jo shakhs islam mein bura tariqa jaari kare us par uska gunah bhi hai aur unka bhi jo us par amal karein aur unke gunah mein bhi kuchh kami na hogi, maloom hua ke islam mein kaare khair ijaad karna sawaab ka kaam hai aur bure kaam nikalna gunah ka kaam
Shami ke muqaddime mein hai ke ulama farmate hain ke ye hadeesein islam ke qanoon hain ke jo islam mein achha tariqa nikale to use us par amal karne waalo ka sawaab milega aur jo bura tariqa nikalega to saare pairwi karne waalo ka gunah milega

Mishkaat mein hai ke jo shakhs humare deen mein aisi raaye nikale jo ke deen se nahin hai to wo mardood hai, deen se nahin hai ke maana ye hain ke deen ke khilaf hai, Ash’atul Lam’aat mein hai ke isse muraad deen ke khilaf aur deen ko badalne waali ho

Isi Mishkaat mein hai ke koi qaum bidd’at ijaad nahin karti magar sunnat uth jaati hai, lihaza sunnat ko lena bidd’at ke ijaad karne se behtar hai

Bidd’at ki mazeed qismein:

Ye to maloom ho chuka ke bidd’at do tarah ki hain, ek achhi aur ek buri, ab yaad rakhna chahiye ke bidd’ate hasana teen tarah ki hain, bidd’ate jaaiz, bidd’ate mustahab, bidd’ate wajib aur bidd’ate saiyyah do tarah ki hain, ek makrooh aur ek haraam, is taqseem ki daleel mulahiza ho:

Mirqaat mein hai:                                                              Bidd’at ya to wajib hai jaise ilme nahaw ka seekhna aur usoole fiqh ka jama karna ya haraam hai jaise jabriya mazhab aur ya mustahab hai jaise musafir khano aur madraso ka ijaad karna aur har wo achhi baat jo pehle zamane mein na thi aur jaise aam jama’at se taraweeh padhna aur makrooh hai jaise masjido ko fakhriya zeenat dena aur ya jaiz hai jaise fajr ki namaz ke baad musafaha karna aur umda umda khano aur sharbato mein wus’at karna

Shami mein hai:
Haraam bidd’at waale ke pichhe namaz makrooh hai warna bidd’at to kabhi wajib hoti hai jaise ke dalail qaaim karna aur ilme nahaw seekhna aur kabhi mustahab jaise musafir khana aur madrase aur har wo achhi cheez jo ke pehle zamana mein na thi unka ijaad karna aur kabhi makrooh jaise ke fakhriya zeenat aur kabhi mubah jaise umda khane sharbato aur kapdo mein wus’at karna isi tarah jaame sagheer ki sharah mein hai”

In ibaraat se bidd’at ki 5 qismein bakhoobi waazeh hui, lihaza maloom hua ke har bidd’at haram nahin balki bidd’atein kabhi zaroori bhi hoti hain jaise ke ilme fiqh, usoole fiqh, Qurane kareem ka jama karna ya Qurane kareem mein ayerab lagana ya aaj kal Qurane kareem ka chhapna aur deeni madraso ke dars waghaira banana

Hashiya:

Is zamane mein ibadaat mein jo bidd’atein shamil hain unki fehrist lambi hai, koi bhi isse bacha hua nahin hai, ab yahan ghair muqallideen apni jaan bachane ke liye kehte hain ke hum ye sab deen samajh kar nahin karte, unka aisa kehna qabile qabool nahin kyunki wo ye sab sawaab ki niyyat se karte hain lihaza deen mein hi naya kaam hua aur ye bidd’at hai, iski tafseel risala “deen samajh kar naya kaam bidd’at?” mein dekhein.                         (Credit:Abde Mustafa)

Latifa:

Ek maulvi saheb kahin nikah padhane gaye to dulhe ne sehra pehen rakha tha, maulvi saheb ne kaha ke ye sehra utaro, ye bidd’at hai, haraam hai, shirk hai, na nabi ne pehna, na sahaba ne pehna aur na tabayeen ne, sehra utaar diya gaya phir usne nikah padhaya to dulhe ke baap ne nazrana maulvi saheb ke haath mein diya, wo use apni jeb mein daalne waale the ke dulhe ne haath pakad liya aur kaha ke ye haraam hai, bidd’at hai, shirk hai kyunki na nabi ne liya, na sahaba ne liya aur na tabayeen ne liya to wo kehne laga ke ye to khushi ke paise hain, dulhe na kaha ke wo sehra bhi khushi ka tha, gham ka na tha, maulvi saheb sharm se doob gaye

Bidd’at ki taqseem par aitrazaat

Aitraz:

Bidd’at sirf deeni kaam ko kahenge jo Huzoor alaihissalam ke baad ijaad kiye gaye, dunyawi kaam ko nahin, lihaza mehfile milad waghaira bidd’at hai aur telephone, rail waghaira ki sawari bidd’at nahin

Jawab:

Deeni kaam ki qaid lagana mehaz apni taraf se hai, ahadeese sahiha aur aqwale ulama aur muhaddiseen ke khilaf hai, hadees mein hai ke har naya kaam bidd’at hai, is mein deeni ya dunyawi ki qaid nahin, agar maan liya jaaye ke hadees mein deeni baat ki qaid hai to phir deeni kaam isi ko to kehte hain jis mein sawaab mile,
ab batao ke niyyate khair se pulaaw khana bidd’at hai ya nahin? neez deeni kaam ki qaid lagana aapke liye koi mufeed nahin, kyunki wahabiyo ka madrasa, wahan ka nisab, daura -e- hadees, tankhwa le kar mudarriseen ka padhana, imtehan aur tateelaat ka hona, aaj qurane paak mein ayerab lagana, quran wa bukhari chhapna, musibat ke waqt khatme bukhari karna waghaira sab bidd’at hain kyunki Huzoor alaihissalam ke zamane mein ye na the, bolo ye haraam hai ya halaal? sirf mehfile milad aur fatiha shareef ne hi qusoor kiya hai? bas ye haraam baaqi sab kaam jaaiz?

Humne Maulvi Sanaullah Amritsari ko apne munazire mein kaha tha ke aap hazraat chaar cheezo ki sahih tareef kar dein jis par koi aitraz na ho jaame maane ho, to jis qadr chahein hum se inaam lein, bidd’at, shirk, deen, ibadat aur ab bhi apne rab ke bharose par kehte hain ke dunya ka koi bhi deobandi, koi bhi ghair muqallid koi bhi shirko bidd’at ki rat lagane waala in chaaro cheezo ki aisi tareef nahin kar sakta jisse uska mazhab bach jaaye, Aaj bhi in sab se ailane aam hai ke inki tareef kar dein lekin inse ye na ho sakega

Humne hadees pesh ki jis mein deen mein achhe naye kaam ko ijaad karne par sawaab ki bisharat hai to ab ye kehna ke har bidd’at gumrahi hai aur bidd’ate hasana ka koi wujood nahin is hadees ke khilaf hai neez Mirqaat, Ash’atul Lam’aat, Shami waghaira ki ibaratein pesh ki ja chuki hain ke bidd’at ki paanch qismein hain

Aitraz:

Mukhalifeen ka ye bhi kehna hai ke jo kaam sahaba, tabayeen ya taba tabayeen ke zamane mein ijaad hua wo bidd’at nahin baaqi in zamano ke baad jo ijaad hua wo bidd’at hai

Jawab:

Ye bhi dhoka hai isliye ke humne saabit kiya ke jo kaam Huzoor alaihissalam ke zamane ke baad hua wo bidd’at hai aur is mein sahaba ya tabayeen ke zamane ki qaid nahin, neez Hazrate Umar Faruque ne taraweeh ki jama’at dekh kar farmaya ke ye to badi achhi bidd’at hai, agar sahaba ke zamane mein naya kaam bidd’at nahin to Hazrate Umar ise bidd’at kyun keh rahe hain?

Qaida ye hai ke har cheez alsan mubah hai lihaza jab tak kisi ki mumanat saabit na ho tab tak use haraam kehna shariat par iftera hai aur wahabi yahi karte hain