MUZDA E RAHMAT E HAQ LYRICS

Muzhdā-e-Rahmat-e-Haq hum ko sunānay wālay
Marhabā ātish-e-dozakh say bachānay wālay

Jitnay Allah nay bhayjay hayn Nabi dunyā mayn
Tayri āmad ki khabar sab hayn sunānay wālay

Mujh say nāshād ko pohncha day Dar-e-Ahmad tak
Mayray Khāliq mayray bichron kay milānay wālay

Dil-e-wirāna-e-‘Āshiq ko bhī kī-jiye ābād
Mayray mahboob Madinay kay basānay wālay

Koi pohnchā na Nabi rutba-e-‘aali ko tayray
Marhabā! Khuld ki zanjīr hilānay wālay

Ba’d-e-murdan mujhay dikhlāyen gay jalwā apnā
Qabr-e-tīrah mayn mere shama dikhānay wālay

Qabr mayn āp ko daykha to Razā nay ye kahā
Dekhiye! Aaey woh murdoñ ko jilānay wālay