Yahudiyon Ka Greater Israel

Yahudiyon ka Da’wa aur Aqwam-e-Alam ki Khamoshi

1. Yahudiyon ka kehna hai ke qadeem zamane mein Yahudi hukumat jahan tak thi, wahan tak ka ilaqa hamara hai, aur hum in tamam ilaqon ko mila kar Greater Israel banayenge.
2. Yahudi qaum qadeem zamano mein ghulami mein bhi mubtala hui thi aur unka qatl-e-aam bhi hua tha. To phir unhe yeh bhi kehna chahiye ke hum ghulami aur qatl-e-aam ke liye bhi tayar hain.
3. Hazrat Sulaiman عليه الصلوۃ والسلام ki hukumat saari duniya par thi aur woh Bani Israel se thay. To phir Yahudiyon ko kehna chahiye ke qadeem zamane mein hamari hukumat saari duniya par thi, is liye saari duniya humein de di jaye.
4. Maazi qareeb mein Angrezon ki hukumat itni wasee thi ke unki saltanat mein sooraj nahi doobta tha. To phir Angrez bhi yeh da’wa kar sakte hain ke woh tamam ilaqay England ke hawale kar diye jayein. America aur Israel par bhi England ki hukumat thi.
5. Maharaja Ashok ke zamane mein Bharat bhi bohot wasee tha. Us waqt ke kai mulk Bharat mein shamil thay. To phir Bharat ko bhi woh tamam mulk hawale kar dene chahiye.
6. Israel kehta hai ke falan mulk se mujhe khatra hai. Is liye self-defense ke naam par woh us mulk ko tabah-o-barbad kar deta hai. Jaise haal hi mein Israel ne mulk-e-Shaam par lagatar fizai hamle kiye aur Shaam ki fauji tanseebaat, hathyaar, fauji adde, jangji tayare, bahri jahazon aur doosre difa’i saaz-o-saamaan ko tabah kar diya.
7. Jis tarah Israel ko doosre mumalik se khatra hai, usi tarah doosre mumalik ko bhi Israel se khatra hai. To phir doosre mumalik ko bhi yeh haq hasil hona chahiye ke woh Israel ko nashud-o-nabood kar dein.
8. Na-insafi aur hatt dharmi par mabni World Order ab chalne wala nahi hai. BRICS naye World Order ki tayyari mein hai. Agarche Turkey ki ghair mutawaqqa ghaddari ke sabab maamla pareshaan kun ho chuka hai, lekin rafta rafta halat durust honay ki umeed hai.
9. Shaam par qabza karne wale baaghi Daesh aur Al-Qaeda ke bache kuche log hain. Daesh ko America aur Israel ne Shaam o Iraq par qabza karne ki zimmedari di thi, taake yeh dono mulk America aur Israel ke matehat ho jayein. Mulk-e-Shaam par baaghiyon ka qabza ho chuka hai aur saath hi Israel ne bhi Shami ilaqon par qabza kar liya hai. Yeh baaghi log Wahabi aur Salafi hain. Inhein Takfeeri Giroh bhi kaha jata hai. Is liye duniya bhar ke Wahabi isey Imam Mehdi ka lashkar batate hain aur iski khub himayat karte hain. Chunke Arab duniya mein Wahabi ko Sunni kaha jata hai, is liye bar-e-sagheer ke baaz Sunni Musalman bhi is khush fehmi ka shikar hain.
10. Abhi Mashriq-e-Wusta ke halat wazeh nazar nahi aa rahe hain. Ho sakta hai ke baaghi giroh Iraq par bhi hamla kare. Yeh bhi mumkin hai ke Shaam mein khana jang shuru ho jaye. Agar Turkey is buhran mein shareek na hota, to Iran aur Russia dakhal andaazi karte. Magar mojooda surat-e-haal mein Turkey ke shamil hone se jung ka khatra hai. Musalman mumalik ke baahmi jung-o-jadal aur BRICS ke toot janay ka bhi khatra hai. Is liye doosre mumalik Tayyab Recep Erdogan aur is buhran ke hal ke liye sust hain.

Writer

Tariq Anwar Misbahi

Join Our Official Whatsapp Channel: https://whatsapp.com/channel/0029VampI720G0Xo3xs5iK1i